2013-cü ildən keçirilən Milli Marketinq Forumu bu ilin may ayında artıq 4-cü dəfə keçiriləcək. Artıq ənənə şəklini aldığından ölkəmizin bir çox marketinq sevərləri hər ilin may ayında keçirilən növbəti forumu gözləyirlər.

MMF Azərbaycanda ən böyük marketinq tədbiridir.

MMF haqqında bu vaxta qədər yüzlərlə fikirlər deyilib. Çox uğurlu olduğunu deyənlər də, tənqid edənlər də olub. Hətta tənqid edənlərin də əksəriyyəti forumun ildən-ilə yaxşılaşdığını qeyd edərək tədbirin ölkəmizin marketinqin inkişafında rolunu xüsusi vurğulayıblar.

Adəti üzrə MMF-in loqosu hər il dəyişilir. Bu işdə MMF-in kreativ tərəfdaşlarının zəhmətlərini unutmaq olmaz. 2013 və 2015-ci illərdə Yello Advertising, 2014-cü ildə Uptime şirkəti MMF-in bütün kreativ, dizayn, vizualizasiya işlərini öz üzərlərinə götürüblər.

2016-cı ildə isə MMF-in kreativ tərəfdaşı ölkəmizdə ən nüfuzlu reklam agentliklərindən olan McCann Baku şirkətidir. McCann Baku şirkəti 3 müxtəlif loqo variantı təklif etmiş, variantların hər üçü bəyənilmiş, yekun olaraq birinin üzərində dayanılmışdır. Aşağıda həmin variantlar göstərilib.

1-ci variant.

2-ci variant.

3-cü variant.

Fevralın 23-də MMF-in yeni loqosu (2-ci variant) ictimaiyyətə təqdim ediləndən sonra bəyənənlər çox oldu. Bir sıra şəxslər tərəfindən isə tənqidlərlə qarşılaşdıq ki, guya bu loqo kopya imiş.

Bəzi iddialarda hətta bu loqonun “E-manat” loqosunun eynisi olduğu deyilir.

Təbii ki, bu barədə McCann Baku şirkəti ilə də söhbət etdik. Əvvəldən də şirkətin bizə təqdimatından bilirdik ki, bu loqo heç bir şəkildə kopya ola bilməz və orijinal ideyaya əsaslanır. Peşəkar marketerlər, peşəkar biznes adamları bilirlər ki, oxşamaq kopyalanmağı şərtləndirmir.

Qeyd edək ki, həm MMF təsisçiləri, həm də McCann Baku şirkəti loqonun formasında E-manat loqosuna həqiqətən də müəyyən oxşarlıqların olduğunu qəbul edirlər. Amma MMF loqosunun ortaya çıxmasında E-manat loqosunun heç bir rolu olmayıb. Çox hörmət etdiyimiz Modenis (E-manat) şirkətinin adının bu məsələdə hallanmasından da təəssüf hissi keçiririk.

Yuxarıda qeyd olunanları, eləcə də loqo ilə bağlı fikir bildirən bütün insanların fikirlərini əsas götürərək bəyan edirik ki, MMF yaxın günlərdə fərqli loqo təqdim edəcək. McCann Baku tərəfindən təklif olunmuş digər variantlardan birinin seçilməsi düşünülür. Yuxarıda da qeyd olunduğu kimi, McCann Baku şirkətinin təklif etdiyi hər üç variant MMF təsisçiləri tərəfindən bəyənilmişdir.

Sonda qeyd edirik ki, Milli Marketinq Forumu yarandığı vaxtdan ayrıseçkilik etmədən hər kəsin fikirlərinə hörmətlə yanaşmış, MMF təsisçilərinə və forumun özünə qarşı mövqeyindən asılı olmadan ən müxtəlif marketinq və biznes peşəkarlarına forumda spiker olmaq imkanı tanımışdır. Bu işlər MMF təsisçilərinin ölkədə marketinqin inkişafına dəstək, həqiqi paylaşmaq platforması yaratmaq missiyasının tərkib hissəsidir və bu işlərdə heç bir qarşılıq güdülmür.

MMF təsisçiləri olaraq bundan sonra da missiyamıza sadiq qalacağımızı bəyan edirik.

 

Diqqətinizə görə təşəkkür edirik!