Bəzən böyük, sistemli şirkətlərdən nisbətən kiçik şirkətlərə keçən insanlar düşünürlər:
“Burada mən nə öyrənə bilərəm ki?”
Məncə, bu çox təhlükəli yanaşmadır.
Çünki əvvəlki şirkətdə işləyən model, struktur, qərarvermə tərzi, proses və yanaşmalar həmin şirkətin strategiyasına (getdikləri yola) – miqyasına, resurslarına, bazar mövqeyinə, insan kapitalına və s. uyğun formalaşıb.
Orada doğru olan hər şey başqa şirkətdə də doğru olacaq deyə bir qayda yoxdur.
Məsələn, böyük bir şirkətdən gələn insan düşünə bilər ki, “biz əvvəl belə edirdik və bu işləyirdi”. Sual odur ki, o yanaşma bu şirkətə nə dərəcədə uyğundur?
Bəzən problem insanın bilməməsində deyil. Əksinə, problem bildiyini unuda bilməməsindədir. Buna “unlearning” deyirlər — yəni əvvəlki təcrübənin yaratdığı avtomatik düşüncə qəliblərini kənara qoymaq bacarığı.
Yeni şirkətə keçəndə əvvəlki şirkəti tamamilə inkar etmək lazım deyil. Amma onu “universal doğru” kimi də qəbul etmək olmaz.
Çünki hər şirkətin öz reallığı var.
Böyük şirkətdə öyrəndiklərin dəyərlidir.
Amma kiçik şirkətin də sənə öyrədəcəyi çox şey var.
Lazım gələndə bildiklərimizi yenidən sorğulaya bilməliyik.
