Daha çox satmaq bahalıdır

Satışın idarə olunmasında bilməli olduğumuz məsələlərdən biri budur.
Hər bir şirkətin satışında komfort zonalar mövcuddur. 1-ci komfort zona odur ki, şirkət xüsusi əziyyət çəkmədən, kampaniya etmədən bəlli bir məbləğdə satış edir. Tutaq ki, 300,000 AZN.
Başqa sözlə desək, şirkət 300,000 manatı rahat (komfortda) satır – özünü çox zorlamadan.
2-ci komfort zonaya keçmək istəyiriksə, biz daha sistemli yanaşmalıyıq, daha çox əziyyət çəkməliyik, daha çox resurs (pul, vaxt və s.) xərcləməliyik. 2-ci komfort zonada hər 1 AZN satış daha baha başa gələcək. Fərz edək ki, 2-ci komfort zonamız 400,000 AZN satışa gətirib çıxarır.
3-cü komfort zona isə bizdən daha çox fədakarlıq və resurs tələb edir. Bu zonada rahatlıq (komfort) daha az olacaq. Çünki biz normal gücümüzün üstünə çıxırıq burda. Burda hər növbəti 1 AZN satış daha da baha başa gələcək.
Bəzi hallarda görürük ki, normalda satış kampaniya xərci misal üçün satışın 5%-ni təşkil edirsə, rəhbərlik 5%-i qorumaqla proporsional olaraq satışın artımını tələb edir. Bu, normal rəqabətli bazarda mümkün deyil. Yuxarıda qeyd etdiyimiz kimi, daha çox satmaq bahalıdır. Növbəti komfort zona daha çox resurs tələb edir.
Təbii ki, satışın bir çox başqa drayverləri də mövcuddur, yalnız kampaniyalar deyil. Burda mənim məqsədim sırf kampaniyanın müxtəlif komfort zonalarda satışa necə təsir etdiyini göstərmək idi. Yəni qəbul edərək ki, digər amillər sabitdir (ceteris paribus).