Şirkətin böyüməsi işçiyə sərf etməlidir

Maraqların uzlaşması biznesdə çox önəmlidir. Yəni şirkətin maraqları ilə müxtəlif maraqlı şəxslərin (steykholderlərin) maraqları uzlaşdırılmalıdır, o cümlədən də işçilərlə.. Nə deməkdir bu?
Şirkətlə işçinin marağı ziddiyyət təşkil etməməlidir yəni. Misal üçün, bəzən olur ki, şirkət böyüyür, işçi öz rifahında müsbət mənada hiss etmir bunu. Əksinə, şirkət böyüdükcə şirkətin artan iş yükü, dərd-səri, problemləri yüklənir işçinin çiyninə. Bu halda işçi böyüməyə dəstək verərmi? – Çətin sualdır.
Bu halda şirkətin böyüməsi işçiyə sərf edərmi? Etməz əlbəttə. Belə olanda işçi niyə maraqlı olsun ki şirkətin böyüməsinə? Bu halda işçi böyüməyə mane olmasa da, ən yaxşı halda xüsusi canfəşanlıq etməz şirkətin böyüməsi üçün. Bizə bu lazımdırmı?
Lazım deyil. Ona görə də çalışmalıyıq ki, şirkət maraqları ilə işçinin maraqlarını uzlaşdıraq. Elə edək ki, işçilər böyümədən dada bilsinlər. Bu, müxtəlif formalarda ola bilər: maaş artımı, bonus artımı, vəzifə artımı, səlahiyyət artımı, bilik artımı və s. İşçinin rifahı şirkətin böyüməsi ilə düz mütənasib olmalıdır.