Bir çox hallarda şirkətlər “sistemləşmə” adına işlər görürlər, amma faydalana bilmirlər. Bunun bir çox səbəbləri var. Ən əsas səbəblərdən biri o olur ki, biznesin ehtiyacı düzgün başa düşülməyib və nəticədə çox qəliz, praktiki olmayan, işi çətinləşdirən “həllər” çıxıb ortaya. Bu, son nəticədə həmin sistemə etibarı da azaldır. Ona görə maksimum çalışmaq lazımdır ki, biznesə gərəkən praktik həllər hazırlansın.

Məsələn, baxırsan çox kiçik şirkətdir, orda qəliz və həcmli prosedurlar, təlimatlar, sxemlər hazırlanıb və nəticədə işləmir. Sistem xətrinə sistem qurmaq olmaz.. Şirkətə uyğun maksimum sadə, etibarlı, praktiki sistem qurulmalıdır. Bir çox şirkətlərin “korporativləşmək xofu” məhz burdan qaynaqlanır. Elə bilirlər ki, korporativləşmək çox kağız-kuğuz, bürokratiya, qəliz prosedurlar, lənglik, ağırlıq deməkdir. Qətiyyən elə deyil əslində. Hər biznesə uyğun həll olmalıdır – zamanla korporativləşmə yetkinliyi artmalıdır.

Bu yaxında bir şirkətdə prosedurlar hazırlayırdı komandamız. Rəhbərlik təəccübləndi ki, mən belə sadə təsəvvür etmirdim.. İzah edirik ki, sizin şirkətdə hələ bir prosedurlarla işləməyin ənənəsini yaradaq, işçilər bu sadə sistemi sevsinlər, etibar etsinlər, sonra zamanla təkmilləşdirmək (biznesə uyğun) ən praktik yoldur.