Kişinin sözü bir olar?

Bu atalar sözünü xırdalamağa, biznesin idarə olunması kontekstində baxmağa ehtiyac var. Çünki biznes idarəetməsində bir çox situasiyalarda hər iki halın mənfilərini görmüşəm. Yəni həm fikri tez-tez dəyişməyin, həm də yeni fikirlərə açıq olamamağın ziyanlarını çox görmüşəm.
Fikri tez-tez dəyişmək, gündə bir ağıla qulluq etmək şirkətə ciddi zərbə vurur. Hərdəmxəyallıqdan xeyir tapan olmur adətən. Yolumuzu (strategiyamızı) müəyyən etməliyik, ciddi şəkildə icraya yönəlməliyik. O başqa məsələ ki, lazım gəldikdə strategiyamıza çəki-düzən verməliyik.
Yeni fikirlərə açıq olmamaq, eqosuna görə əvvəlki fikrindən, qərarından vaz keçməmək də biznesə zərbə vurur. Yetkin menecer öyrənməyə, səhv bildiklərini “unudub” yeni bilgilər əldə etməyə son dərəcə açıq olmalıdır.
Bəzi hallarda olub ki, əvvəl verdiyim qərarı dəyişmişəm. Çünki görmüşəm ki, səhv olub qərar. Burda utanılası, çəkiniləsi bir şey yoxdur. Açıq, şəffaf kommunikasiya ilə komanda ilə də danışılmalıdır ki, filan qərarımız yanlış olub, ona görə dəyişmək məcburiyyətində qaldıq. Və ya ola bilər ki, işçilərin haqlı, məntiqli əsaslandırmalarına görə qərarı dəyişərik. Heç bir problem yoxdur. Rəhbər xarizmamız zədələnməz, əksinə hörmət qazanarıq.