Nə qədər arzulamasaq da, bu işin (idarəçiliyin) içində kimisə işdən çıxarmaqlar da var. Bir çox idarəçilərin çətinlik çəkdikləri mövzudur bu – işdən çıxarma prosesini yaxşı idarə etmək lazımdır. İşdən çıxarma ilə bağlı bəzi fikirlərimi tezislər şəklində bölüşürəm.
- Rəhbərlik işçini çıxaracağını qətiləşdirən kimi işçiyə bildirməlidir. Bəzən rəhbərlik qərar versə də, bunu işçiyə deməyi ən son ana saxlayır, bu yanlışdır. İşçiyə vaxtında demək lazımdır ki, o da işini bilsin.
- İşdən çıxarılma səbəbləri səmimi şəkildə danışılmalıdır. İşdən ayrılan hər kəslə qarşılıqlı hörmətin qorunmasında maraqlı olmalıdır şirkətin rəhbərliyi.
- İşdən çıxarılan işçi ilə şirkət arasında hər hansı səbəbdən inciklik yaranıbsa, işdən çıxarılma qərarı bildiriləndən sonra çalışmaq lazımdır həmin işçi şirkətdən uzaqlaşsın. Əks halda həmin işçinin bir müddət şirkətdə qalması mühitin korlanmasına səbəb olur çox vaxt.
- İşdən çıxan işçilərlə çıxış intervüsü (exit interview) mütləq edilməlidir. O şəxslərdən adətən çox önəmli feedback gəlir.
- İşdən çıxan işçiyə uğur arzulamaqla yanaşı çalışmaq lazımdır ki, hansısa şəkildə emosional bağ qorunsun. Çalışmaq lazımdır ki, körpülər yanmasın. Bəzi dünya şirkətləri işin bu tərəfinin üzərində ciddi işləyirlər, məzun statusu verirlər həmin işçiyə. Həmin status o işçiyə müəyyən imtiyazlar verir.
- Kiminlə işləmək istəmiriksə, bunu səmimi şəkildə dilə gətirək. Fakt və sübut axtarmaq şirkətə ziyanlıdır. Bəzən olur ki, elə mahir “siyasətçi”lər olur ki, onların şirkətə ziyan vurduğu heç kimdə (və ya çox adamda) şübhə doğurmur, amma “əllə tutulan” faktlar qoymurlar. Bu şəxslərlə yolları ayırmaq üçün çox gözləməyə ehtiyac yoxdur. Səmimi və açıq şəkildə söhbət etmək lazımdır ki, biz sizinlə işləmək istəmirik. Əks halda etimadsızlıq mühiti olur ki, o şəraitdə əməkdaşlığı davam etdirmək heç kimə xeyir gətirməz.
- Kimisə işdən çıxaranda əmin olmaq lazımdır ki, başqa çarə yoxdur. Başqa çarə dedikdə işçinin öyrənməsi, zaman tanınması, uyğunlaşması və s. nəzərdə tuturam. Çünki işçini işdən çıxarmaq ən asan yoldur – bunu o zaman etməliyik ki, başqa çarəmiz yoxdur.
- İşçini alçaltmaq, şəxsiyyətinə toxunmaq olmaz qətiyyən. Ola bilər o işçi sizə uyğun deyil, amma başqa yerə uyğun ola bilər. Hətta başqa şirkətə uyğun olmazsa belə bunun işçinin insanlığına aidiyyəti yoxdur. Biz hamıya əvvəlcə insan kimi hörmət etməliyik. Onun işçi olması sonrakı məsələdir.
