Sual qəribə görünə bilər. Amma həqiqətən də rəhbərin dövrü olaraq işçilərə hesabat verməsinin şirkətə faydası olduqca böyükdür. Öz təcrübəmdə bunun faydasını görmüşəm. İldə bir neçə dəfə işçiləri yığıb onlara şirkətin vəziyyəti, planlar, hədəflər, çətinliklər barədə məlumat verməkdən, önəmli qərarların əsaslandırılmasından söhbət gedir. Bundan başqa, əldə olunmuş nəticələr haqda danışılır, bu nəticələrdə işçilərin rolu qabardılır. Şirkəti qarşıda gözləyən önəmli addımlar bir daha xatırlanır, bütün komanda o işlərə səfərbər olunmuş olur, yaxşı mənada həyəcan yaranır. Bu ənənənin şirkətə aşağıdakı faydaları olar:
· İşçilər özlərini “sayılmış”, “hörmət edilmiş” kimi qəbul edəcəklər
· Rəhbərliyin məsuliyyətini göstərir
· İşçilərin dəstəyini qazanmaq asanlaşır
· İşçilər şirkətə daha çox bağlanmış olurlar
· Şirkətdə “həyəcan”ı ölməyə qoymur
· İşçilər önlərini görmüş olurlar, qeyri-müəyyənlik azalır, aydınlıq olur.
· Rəhbərliklə işçilərin dialoqu dərinləşir
· İşçiləri nəticəyə, hədəflərə kökləmək asanlaşır