Korporativ idarəetmə sistemi olan şirkətlərin mütləq əksəriyyətində menecment qərarları İdarə Heyəti üzvlərinin səs çoxluğu ilə qəbul olunur. Bu kollegial sistemin bir çox üstünlükləri var əlbəttə. Demokratik mühit olur, bir nəfərin iradəsi hər şeyi həll etmir, müzakirə mədəniyyəti olur və s.
Amma İdarə Heyəti mexanizmi heç də ideal deyil. Bəzi mənfi cəhətləri var ki, onların fərqində olmaq lazımdır. Ən böyük problemlərdən biri “Groupthink” məntiqidir. Fərdi yox, qrup məsuliyyəti olduğu üçün qərarlar bəzən çox da keyfiyyətli, optimal olmaya bilir. Mümkün haldır ki, verilmiş cəsarətli və riskli qərarı tək-tək üzvlərin məsuliyyətinə buraxsan heç biri ayrı-ayrılıqda o məsuliyyəti götürməzlər.
İdarə Heyətinin üzvü kimi uğuruna çox inandığın bir məsələni bəzən təklif etmirsən, çünki digər İdarə Heyəti üzvlərinin o məsələ haqqında fikirləri sənə məlumdur – boşuna özünü və digərlərini yormursan.
Başqa bir mümkün problem də odur ki, daha nüfuzlu və statuslu (vəzifəli və s.) üzvlərin dominantlığı ola bilir.