Əksər uğurlu idarəçiləri birləşdirən cəhətlərdən biri də onların optimist olmalarıdır. Optimizm idarəçiyə güc verir. Daxili optimizm sənə güc verir ki, problemlərin altında əzilməyəsən. Optimizm sənə imkan verir ki, biznesə marafon kimi baxa biləsən.
Eyni zamanda ehtiyatlı olmaq lazımdır ki, optimizm qərəzi sənə mane olmasın. Bəzən aşırı optimizmin təsiri altında qalaraq qeyri-real hədəflər qoyuruq, qeyri-real gözləntilərdə ola bilərik. Bütün hallarda reallıq hissini itirməməliyik.
Optimizm inanmaqdır, pozitiv yanaşmağa çalışmaqdır. İnanmadan çətin olur işləmək. Hər şeyin risk tərəfini düşünsək, problemli və qaranlıq tərəflərini düşünsək, işləmək çətin olar.
Optimizm sənin həyat eşqini artırar.
Optimizm sənin davamlı öyrənməyini təşviq edər.
Optimizm sənin yarış hissini artırar.
Optimizm səni gələcək haqda düşünməyə, qısamüddətli yanaşmadan çəkinməyə çağırar.
Optimist idarəçilər adətən pozitiv və enerjili olurlar, ətrafa da müsbət enerji yayırlar.
Optimist idarəçilər stres qarşısında daha dözümlü olurlar.
Optimist idarəçilər qaranlıq, problem axtarışında olmadıqları üçün insanlara inanmağa üstünlük verirlər ki, bu da bir çox hallarda müsbət nəticələrə gətirib çıxarır.
Bunların hamısını nəzərə alaraq ümumiləşdirə bilərik ki, yanaşma olaraq optimist olmalıyıq, eyni zamanda reallıq hissini itirməməliyik. Optimizm reallığın inkarı demək deyil.
Təkcə rəhbərliyin optimist olması kifayət etmir. Çalışmaq lazımdır ki, şirkətdə optimist, pozitiv bir mühit, ab-hava yaransın. Optimizm mühiti şirkətin effektivliyinə birbaşa müsbət təsir edir. Bacardığımız qədər neqativdən, pessiimizmdən qaçmalıyıq.
Problemlərə, dəyişə bilmədiklərimizə fokuslanmaqdansa, əlimizdə olanlara, fürsətlərə fokuslanmalıyıq.
Optimizm həyat tərzi olmalıdır. Optimizm şirkətin korporativ mədəniyyətinin tərkib hissəsi olmalıdır.
Optimizm şirkətin gizli aktividir.
