Z nəsli söhbəti niyə şişirdilir?

Arada elə bilirəm ki, biznes icması üçün süni mövzular istehsal olunur davamlı olaraq. Z nəsli söhbətinin çox şişirdilməsi də bu qəbildəndir.
Sosial elm adamlarının bu nəsil bölgüsü  (Baby boomers, X, Millenials, Z, Alfa və s.) ilə işim yoxdur. Məsələ Z nəsli söhbətinin biznes idarəçiliyində çox şişirdilməsindən gedir.
Mən belə düşünürəm ki, sadəcə trendlər dəyişir. Texnologiyanın inkişafı, sosial inkişaf və s. yeni mühit yaradır və bu mühitdə böyüyən nəslin yanaşması fərqli olur. Bu, çox normaldır.
Bəs fərqli yanaşma dediyimiz nədir? (Bəzilərini qeyd edirəm)
1.    Komfort axtarırlarmış. Niyə axtarmasınlar ki? Bu nəsil həyatlarının tamamını digital dövrdə yaşayıblar. Çox normaldır ki, digital alətlərin köməyi ilə işlərini (həm də şirkətin işini) asanlaşdırmağa meyllidirlər.
2.    Sorğulayırlarmış. Kritik yanaşırlar hər şeyə. Mən düşünürəm ki, bunun əksi anormaldır. “İşçisən, otur işçi yerində” yanaşmasını qəbul etmirlər. Çox normaldır. Biz rəhbərlərə bir daha xatırladırlar ki, bizə insan kimi yanaşın ilk növbədə. İşçi olmamışdan qabaq insanıq.
3.    Sərbəstliyə can atırlarmış. Çox normaldır. Niyə belə olmasın ki? Başa düşürəm, çətindir idarə etmək. Daha peşəkar idarəetmə, daha peşəkar liderlik tələb olunur bu halda. Ən doğrusu budur amma. Mən şəxsən hər zaman tərəfdarı olmuşam ki, işçilər rahat (sərbəst) buraxılsın, sadəcə tələbkarlıq artsın. Bu halda biz tələbkarlığı da daha çox haqq edirik. Çünki nəticə yönümlü qururuq münasibətləri – mikromenecment tətbiq etmirik, işə gecikəndə gününü qara etmirik, mənasız qadağalar tətbiq etmirik, maraqlarına və şəxsi həyatına hörmət qoyuruq və s.
4.    Çox loyal deyillərmiş. Qardaş, loyal olmaq heç kimin borcu deyil. Elə iş yeri yarat ki, yaxşı kadrlar sənin şirkətində işləməyə can atsınlar. Loyallığa fokuslanmağı ümumiyyətlə heç vaxt qəbul etməmişəm. Elə mühit yaratmaq lazımdır ki, işçilər işlədikləri müddətdə bağlı olsunlar şirkətə, can yandırsınlar, işin haqqını versinlər.
Nəticə olaraq onu qeyd etmək istəyirəm ki, Z nəsli heç də qorxulu deyil. Sadəcə daha peşəkar idarəetmə, daha peşəkar liderlik tələb olunur. Z nəslini mən çox sevirəm. Onlar praqmatik, məntiqi yanaşan, müasir, insana (yalnız rəhbərə deyil) hörməti önə çıxaran nəsildir.