Bəzən şirkət böyüyür, böyüyür, şaxələnir, işçilərin də sayı artır.. Bir də görürsən ki, belə bir mənzərə çıxıb ortaya: 
Çoxlu adam qabaqlarında komputer ciddi-ciddi işləyirlər. İclaslar keçirirlər, əllərində kağız-kuğuz ora-bura qaçırlar. Hamısı nəsə edir. Hər şey var, amma dərinə gedəndə görürsən ki, IŞIN ÖZÜ YOXDUR ORTADA. Başqa sözlə, hamı işləyir, amma “iş görən” yoxdur.
İşlər səmərəli və effektiv olmamağa başlayır. Bu səbəbdən,
1) Lazım olan qədər və lazım olan qaydada böyümək lazımdır
2) Şirkətin böyüməsi elə idarə olunmalıdır ki, şirkət böyüdükcə sistemin gücü çatsın. Şirkət idarəolunan halda qalsın. Nəzarətdən çıxmasın.
Şirkət böyüdükcə menecment sistemi də yeni situasiyaya uyğunlaşdırılmalıdır. Elə etmək lazımdır ki, mürəkkəbliklər də minimum olsun.
Şirkət böyüyəndə işçilər əvvəlki kimi qalırsa, heç nə alınmayacaq. Işçiləri də hazırlamaq lazımdır böyüməyə. Şirkət böyüdükcə böyüməyən işçi həmişə inkişafı ləngidəcək. Təbii ki, yalnız işçidən asılı deyil bu. Şirkət işçiləri hazırlamaq üçün hər şey etməlidir.
Bü gün rəhbərə 3 nəfər birbaşa tabedirsə, sabah böyüyəndə 10 nəfər olmamalıdır bu. Hesabatlılıq sistemi də uyğunlaşdırılmalıdır. Bütün sistem uyğunlaşdırılmalıdır.
Ümumiyyətlə, çalışmalısan ki, əsasız yerə böyüməsin şirkət. Çalışmalısan ki, şirkətin gəlirlərini şirkətin ölçüsünü böyütmədən artırasan. Burda 2 əsas amil rol oynayır:
1) Şirkətin təcrübəsi artdıqca resursları artırmadan prosesləri təkmilləşdirməklə daha çox gəlir gətirmək olur.
2) Şirkətin istifadə olunmamış gücündən istifadə etmək. Məsələn, avadanlıqların istehsal gücündən.
Buna “Economies of scale” də deyilir – Artan satış həcmindən faydalanma. Şirkət resursları artırmadan daha çox satış və gəlir qazanır. Həm də hər istehsal olunan məhsulun maya dəyəri aşağı düşür. Əvvəl 1000 manatlıq elektrik enerjisi 500 məhsul arasında bölünürdü, indi 600 məhsul arasında bölünür.
Yalnız bu hədd “doyanda”, resursların istifadəsi maksimum mümkün optimal həddə çatanda resursların artırılması aktual olur. Kobud misal çəksək, bankın filiallarının sayı 10-dan 80-ə çatanda baş ofisdəki işçilərin də sayını müəyyən qədər artırmaq zərurəti yaranacaq.
