Korporativləşmə xatirinə korporativləşmək olmaz

Korporativləşmək nə deməkdir? Korporativləşmək əslində daha yaxşı şirkət strukturu və iş sistemi formalaşdırmaq deməkdir, daha yaxşı şirkət olmaq deməkdir yəni. Bir çoxları bunu səhv anlayıb. Sanki korporativləşmək çoxlu kağız-kuğuz yaratmaq, hər nəfəs almaq üçün az qala sənəd forması yaratmaq deməkdir. Yox qardaşım, bununla sən şirkəti daha yaxşı şirkət etmirsən. Rəqiblər sürətli manevr edən zaman sən kağız-kuğuzla əlləşirsən. Hər şeyin bir qədəri olmalıdır. Mənası olmalıdır. Hər bir sənədləşmənin xeyri onun ziyanından (vaxt, enerji, bezdiricilik və s.) çox olmalıdır.
Digər tərəfdən, korporativləşmək məqsəd yox, vasitədir. Ona görə də vaxtı çatmayanda, lazım olmayanda elə korporativləşmək xatirinə korporativləşmək də yanlışdır.
Bir mərhələdən sonra korporativləşmək qaçılmaz olur. Baxırsan ki, daha əvvəlki kimi işləmək olmur. Nizamsız böyüdüyün halda qeyri-effektivlik, səmərəsizlik qaçılmaz olur. Bu halda da lazım olan qədər korporativləşmək lazımdır, sonra da ehtiyaca uyğun olaraq korporativliyi dərinləşdirmək olar. Bütün hallarda bir rəhbər olaraq imkan verməməlisən ki,
-korporativləşmə şirkətin ziyanına işləsin
-kimlərsə korporativləşmədən sui-istifadə edərək işi ləngitsinlər
-şöbələr özlərini “muxtar respublika” kimi aparsınlar
-korporativlik şirkətdəki yaxşı iş mühitinə, mehribançılığa zərbə vursun
-mənasız və vaxt aparan iclaslar olsun
-İşçilərlə rəhbərlik arsında uçurum olsun və s.