Tez-tez bu mövzu gündəmə gəlir. Şirkət rəhbərləri bəzən ən arzuolunmaz işçi hesab edirlər “boss.az” tipli saytlara 
girən işçiləri. Həmin işçilərə xəbərdarlıq edənlər də olur. Xəyanətdə suçlayanlar da olur həmin işçiləri.
Mən necə düşünürəm bu haqda?
Mənim fikrim odur ki, işçi işlədiyi yerdə vicdanla işləməlidir. Həmin şirkət üçün bütün bacarığını ortaya qoymalıdır.
Amma bu, o demək deyil ki, işçi gözünü yumaraq ətrafa baxmadan işləsin, əmək bazarındakı vəziyyəti izləməsin.
Rəqabətdir. Şirkətini elə şirkət elə ki, hər kəs burda işləmək istəsin. İş saytlarına baxıb qaçmaq istəməsinlər. Baxsalar da, görsünlər ki, burda qalmaq yaxşıdır. Bağlansınlar şirkətə. Qarşılıqlı olmalıdır münasibət. Birtərəfli şəkildə loyal olmaq məcburiyyətində deyil heç bir işçi.
Şirkət (işəgötürən) özünü elə aparmamalıdır ki, sanki işçiləri dünayaya elə bu şirkətdə işləmək üçün gəliblər. İşçi və işəgötürən hər ikisi məmnun deyillərsə, münasibətlər qarşılıqlı faydalı (win-win) deyilsə, həmin işçinin şirkətdə qalması da doğru deyil.
Bu həm də o deməkdir ki, işin səni qane etmirsə, şirkətdə ola-ola işləməmək, işdən boyun qaçırmaq doğru deyil. Vaxtında çıxıb getməlisən bu halda. Şirkətdə işləyirsənsə, vicdanla işləmək borcundur.
Əmək bazarında rəqabət gücləndikcə şirkətlər də daha məsuliyyətli olacaqlar işçilərlə münasibətdə. Yaxşı işçilərin qiymətini daha çox biləcəklər. İşçilər də yaxşı şirkətlərdə işləməyə çalışacaqlar.
Eyni zamanda, uğurlu və peşəkar karyera ciddiliyi sevir. Gündə bir yerdə işləmək, qısamüddətli yanaşma yaxşı qarşılanmır haqlı olaraq. Ciddi, məqsədyönlü, ardıcıl olmaq lazımdır seçimlərdə.
