İşçilər rəhbərlərindən çox şey öyrənirlər normalda. Onların məsələlərə yanaşmasını, qərarvermə tərzini və s. öyrənirlər. Rəhbər də bu işi gərək işçinin ümidinə buraxmasın. Özü də davamlı olaraq işçiləri öyrətsin. Yeri gəldikcə bu qərarın niyə bu şəkildə verildiyi, bu işlərin niyə belə olduğu, işçinin ilk baxışda görmədiyi çətinliklər (səhnə arxası) göstərilməlidir. Bu, işçinin üfüqünü genişləndirir, daha tez inkişaf etməsinə səbəb olur.
Amma rəhbər işçini özünə oxşatmağa çalışmamalıdır. “Mini me”-lər yetişdirmək olmamalıdır məqsəd. Elə etmək lazımdır ki, işçi özü nəticə çıxara bilsin, özü ola bilsin. Çünki işçinin özünə məxsus güclü və zəif tərəfləri, baxışları, bilikləri, özəllikləri var, çalışmaq lazımdır onun potensialını üzə çıxarasan və daha da inkişaf etməsinə təkan verəsən.. Çalışmalısan ki, işçi şüurlu şəkildə məsələlərin kökünə baxa bilsin, özü düzgün nəticələr çıxara bilsin.
