Şirkətdə dövriyyə vəsaitinin nəzarətdən çıxmasına imkan verməməliyik. Əks halda böyük problemlərlə üzləşə bilərik. Dövriyyə vəsaitini sistemli olaraq nəzarətdə saxlamaq üçün “nağd vəsaitin dövretmə tsikli”nə baxmalıyıq. Buna ingiliscə Cash Conversion Cycle (CCC) deyirlər. CCC-nin mahiyyətini anlamağa çalışaq. CCC onu nəzərdə tutur ki, şirkətin nağd vəsaitlərinə 3 göstərici təsir edir: 1) Müştərilərdən alacaqlar, 2) Malsatanlara (tədarükçülərə) verəcəklər, 3) Mal-material (inventar). Məqsəd ondan ibarətdir ki, alacaqları mümkün qədər tez almaq lazımdır, verəcəkləri mümkün qədər gec ödəmək lazımdır, mal-materialı anbarda daha az saxlamaq lazımdır. Bu 3 göstəricinin hər birinin ölçü vahidi “gün sayı”dır: yəni müştərilər pulu neçə günə ödəyir, biz malsatanlara (vendorlara) neçə günə ödəyirik, mal-material anbarda neçə gün qalır. CCC düsturu aşağıdakı kimidir:
CCC = alacaq gün sayı + inventar gün sayı – verəcək gün sayı
CCC – pulun neçə günə dövr etdiyini göstərir. Dövretmə tezliyi (CCC) nə qədər qısa olarsa, şirkətin nağd pul problemi bir o qədər az olur. Ona görə də şirkət davamlı şəkildə bu 3 göstəricini nəzarətdə saxlamalı, nəticədə CCC-ni aşağı tutmalıdır.
