Son illər dünyanın qabaqcıl bizneslərində müşahidə olunan trendlərdən biri odur ki, biznesin dəyərini formalaşdıran müxtəlif elementlər üzrə dəyərin hesablanmasına xüsusi diqqət yetirilir. Məsələn, müştəri portfelinin dəyəri hesablanır – CLV (customer lifetime value) ilə. İşçilərin şirkət üçün yaratdığı/yaradacağı dəyər hesablanır – ELV (employee lifetime value) ilə. Markanın (brendin) dəyəri hesablanır. Şirkətin malik olduğu əqli mülkiyyətin, nou-haunun (know-how) dəyəri hesablanır.
Sual edərsiniz ki, dəqiqliklə heablanıla bilirmi bu dəyərlər? Cavab odur ki, hələ ki möhtəşəm dəqiqlikdən söhbət getmir. Çox asan iş deyil bu sadalananların hesablanması. Bəs bu çətin işdə niyə bu qədər israr edilir? Niyə bunun üzərinə bu qədər gedilir?
Çünki şirkətin ana məqsədi dəyər yaratmaqdır. Bunu mütərəqqi biznes dünyasında demək olar hər kəs qəbul edir artıq. Ona görə ən vacib olanın ölçülməsinə, hesablanmasına çalışılır ən azından. Bu zaman “zərgər dəqiqliyinə” çatılmaya bilər. Məsələ onda deyil. Məsələ ondadır ki, vacib olanın fərqində olmaq lazımdır. Vacib olanı (bu halda şirkətin dəyərini) ölçmək lazımdır ki, böyüdə biləsən.
