Bəli, ilk milli marketinq forumu. 29-30 may tarixlərində Azərbaycanda ilk milli marketinq
forumunu keçirəcəyik. Forum haqda dolaşan bəzi suallara aydınlıq gətirim:
Məqsəd nədir? – Forumun məqsədi Azərbaycanda marketinq aktivliklərini daha ciddi məcraya salmaq, forum ənənəsini qoymaq, marketerlər üçün paylaşma imkanı yaratmaqdır.
İdeya necə yarandı? – Mart ayında 90 şirkətdən 111 nəfərin iştirakı ilə “Marketerlərin 4Ç görüşü”nü keçirəndən sonra haqlı tənqidlərlə qarşılaşdıq ki, daha ciddi format tapılmalıdır marketerləri bir yerə toplamaq üçün. Biz bu tənqidi o zaman normal qəbul etdik. Hörmət etdik o insanlara. Təkcə bununla da kifayətlənməyib işə başladıq. Artıq bir neçə gün qalıb foruma.
İndi baxıram ki, 2 ay əvvəl bizi tənqid edənlər də təşkilatçılardır bu gün. Tənqid belə olmalıdır. Sağlam tənqid buna deyirlər.
Biz bunu bacardıq. İnşallah daha yaxşı şəkildə başa vuracağıq.
Təşkilatçı kimdir? – Facebook-da məşhur Marketing Azerbaijan qrupunda çağırış etdik ki, təşkilatçılıq hər kəsə açıqdır. Kim “qolunu çırmalayıb” işə başlayacaqsa, təşkilatçı odur. Beləcə, forumun təşkilatçılıq prosesində əvvəldən tanımadığmız insanlarla tanış olduq, yüksək entuziazm ilə bu işi başa çatdırmaqda qərarlıyıq.
Spikerlər necə seçilib? – Forumun aktiv təşkilatçıları olaraq çalışdıq ki, auditoriya üçün maraqlı spikerlər, maraqlı şirkətlər seçilsin. Əlbəttə, əsasən subyektiv əsaslarla seçildi spikerlər. Obyektiv kriteriyalar mümkün deyil bu məsələdə. Hər bir təşkilatçı tamam başqa insanları spiker kimi görmək istəyər. Bunun həlli rəqabət şəraiti yaratmaqdır. Qoy forumlar, bu tipli tədbirlər çox olsun, o zaman həm keyfiyyət yüksələr, həm də marketerlər üçün seçim imkanı yaranar.
