Sosial şəbəkələrdə sual ünvanlamışdım ki, “CEO hansı biznes funksiyasından (maliyyə, marketinq, əməliyyatlar, HR, satış və s.) gəlməlidir?”

Çox maraqlı cavablar oldu. Cavab yazan hər kəsə təşəkkür edirəm.

Öz cavabım bu şəkildədir:

CEO biznesi konseptual olaraq yaxşı anlamalıdır. Biznesin mahiyyətini yaxşı bilməlidir. İdarəetməni bilməlidir. Bunun üçün də biznes funksiyaları haqqında fundamental biliklər kifayətdir. Burdan yola çıxaraq deyə bilərik ki, CEO-nun hansı funksiyadan gəlməsinin bir fərqi yoxdur. Əsas odur ki,

1. Konseptual bacarıqları güclü olsun. Yəni biznesi yaxşı dərk eləsin, biznesi yaxşı görə bilsin.

2. Müxtəlif biznes funksiyalarını balanslaşdıra bilsin. Maliyyədən gəlibsə, qərar verəndə təkcə maliyyə perspektivindən baxmamalıdır məsələlərə. Və ya təkcə satış yönündən baxmasın. Təkcə HR yönündən baxmasın və s.

Balanslaşdıra bilmək yetkin menecerə aid xüsusiyyətdir.

3. Ümumiyyətlə CEO yetkin menecer olmalıdır. Yetkin menecer təkcə biznes funksiyalarını (satış, HR, marketinq, maliyyə və s.) balanslaşdırmır. Yetkin menecer eyni zamanda

– İdarəetmə funksiyalarının (planlama, təşkiletmə, liderlik, nəzarət) qızıl balansına nail olur

– Bacarıqların (texniki, emosional, konseptual bacarıqlar) qızıl balansına nail olur

– Fərqli və bəzən də ziddiyyətli maraqları olan steykholderlərlə münasibətdə qızıl balansa nail ola bilir

– Və s.